Elsta barnið komið í afvötnun!

Elsta stelpan mín, Þuríður Erna, var að hætta með snuddu í gærkvöld. Þvílíkt org og sorg og kvein og vein! Ég skildi 100% hvernig henni leið, enda ekki svo langt síðan að ég hætti að reykja og þetta var einfaldlega alveg eins! Þuríður Erna hótaði að klippa allt dótið sitt, lofaði svo öllu fögru, þóttist aldrei hafa samþykkt að hætta o.s.frv. Hún sofnaði þó á endanum með 4 snuddur í gullskó úti í glugga í veikri von um að jólasveinninn myndi taka snuddurnar og skilja eftir pakka (ekki sígarettur þó). Viti menn, 14 dögum eftir jól kom sveinki við og skildi eftir bók! Snemma um morguninn sá Þuríður Erna þetta og sagði með ólund "ég sé alveg að þetta er bók. Mig langar ekkert í bók." Enda á jólasveinninn auðvitað að gefa það sem manni langar mest í - snuddur. En þetta gekk allt mikið betur í kvöld.

Í dag fékk Þuríður Erna að ráða öllu í verðlaun. Hún tók sér frí í leikskólanum og fór með mömmu sinni með Ragnheiði í þriggja mánaða skoðun og sprautukokkteil. 6950 grömm og slatti af sentímetrum. Ragnheiður drakk í skoðun og mældist 140 grömmum þyngri eftir það. Svo fóru mæðgurnar á Súfistann í huggulegheit með Kristjáni Brynjari og Haddý. Mæðgurnar kíktu í búðir, sóttu Hrafnkel á leikskólann og hittu mig í bíó í Smáralind. Við sáum Alvin og íkornana. Ágætis fjölskylduskemmtun. Þetta var líka í fyrsta sinn sem Hrafnkell fór í bíó og hann fílaði það vel og hann "gáaði att ammi!" þ.e. kláraði allt nammið. Svo var þetta líka í fyrsta sinn sem Ragnheiður fór í bíó, en það gekk bara vel að hafa hana með. Ég steikti svo hamborgara í kvöldmat.

Nú situr sú stutta og kúkar í gríð og erg..

yfir og út
i-rod